Fimmta námsstefna Landssamband slökkviliðs og sjúkraflutningamanna, „Á vakt fyrir Ísland“, fer fram dagana 17. og 18. október 2025 á Reykjavík Natura Berjaya Iceland Hotels.

Á vakt fyrir Ísland er fagleg námstefna fyrir þá sem starfa í slökkviliði, utanspítalaþjónustu og öðrum sviðum neyðarviðbragðs. Fjölbreytt dagskrá með fræðandi erindum, fagnámskeiðum, sýningum og spennandi kynningum – allt tengt því sem við stöndum frammi fyrir í daglegu starfi.

Lærðu af reyndu fagfólki, prófaðu nýjungar og hittu starfsfólk hvaðanæva af landinu – með góðum mat og samveru. Þetta er viðburður sem enginn fagmaður í neyðarþjónustu ætti að láta fram hjá sér fara.

Tvö fagnámskeið verða í boði fimmtudaginn 16. október. Skráning er hafin!

Boðið er upp á tvö fagnámskeið, fimmtudaginn 16. október kl. 8-16.

Verð fyrir námskeiðið er 5.000 kr fyrir félagsmenn LSS. Innifalið í verði er hádegismatur og kaffiveitingar.

------------------------------------------
CHRISTINA MARTINKA - Air Medical Experts LLC

Námskeið um sérhæfða flutninga í bráðaþjónustu með fyrirlestrum um öndunarstuðning, barnasjúkdóma og nýburalíf. Fyrir hádegi er fjallað um öndunarvandamál, flókin barnatilfelli og endurlífgun nýbura ásamt verklegri kennslu í naflastrengsæðalegg.

Eftir hádegi eru tekin fyrir efni eins og blóðsýking, hjarta- og lostmeðferð, alvarleg slys og endurlífgun. Deginum lýkur með verklegum tilfellum þar sem þátttakendur beita greiningu, meðferð og flutningsáætlunum fyrir bæði börn og fullorðna. Handbækur og æfingadúkkur styðja við kennsluna.
------------------------------------------

LARS AXELSSON - The Swedish Fire Nerd.

Þetta námskeið fjallar um mikilvægi dreifðrar ákvarðanatöku sem eina raunhæfa leið til árangursríkrar aðgerðarstjórnunar. Með sviðsmyndamiðaðri þjálfun er farið yfir viðbrögð við dæmigerðum íbúðar- og atvinnuhúsnæðisbrunum, ásamt því að greina fyrstu skrefin þegar úrræði eru takmörkuð og hvað skiptir mestu máli að framkvæma strax.

Þátttakendur kynnast heildarstefnu aðgerða með hollenska fjórflokkakerfinu (Dutch 4 quadrant model), tækjabúnað, hlutverk seinni áhafna á vettvang og hvernig best er að skipuleggja samskipti og aðgerðastjórn. Lögð er áhersla á að dreifð ákvarðanataka verði aðeins árangursrík með stöðluðum vinnubrögðum.

Á föstudagskvöldið verður ,,Frívaktin" á slökkvistöð SHS í Skógarhlíð.

Þar verður grill og létt stemmning, mikilvægt að skrá sig til að missa ekki af því.

ÁVFÍ er metin til eininga í endurmenntun. Samkvæmt samkomulagi Fagdeildar sjúkraflutninga og Endurmenntunarráðs leiðbeinenda í skyndihjálp verður námstefnan metin til eininga í endurmenntun hjá Slysavarnarfélaginu Landsbjörg og Rauða Kross Íslands.

Til að fá ráðstefnu/námskeið metið þarf að senda staðfestingu á hildurvk@redcross.is og/eða fyrstahjalp@landsbjorg.is

Ráðstefna = 1 eining
Námskeið = 1 eining